新一年，新開始，2016年第一次同讀者見面，先祝大家新年快樂，樣樣今年勝舊年。新年用新月曆，自從有了智能手機，所有公司會議、朋友見面都記在電子日記，但我依然慣用座枱月曆，電腦方便，不過用紙製月曆，感覺實在點，即興起來想記住甚麼，就即時寫在月曆上，有時間才慢慢入回手機。從前做銀行銷售，每年例必訂製座枱月曆送給客戶，同時亦收到各大機構或銀行送來的月曆，因此月曆我見得多，亦做得多，知道做月曆不如想像中簡單，要做到人人鍾意，並且放在枱頭使用，月曆的紙質、重量、大小、每頁空白位、是否附貼紙都要講究。
今年照例收到許多月曆，最得我心的，是來自香港國際機場的那個，上星期朋友聚會，遇見TVB前同事、現在機場管理局任職的張頌恩Cathy，從機場趕來見面，還未坐下，她就從袋中拿出兩樣東西。第一件，是機場自家設計的2016年月曆，打開包裝，一陣驚喜，每個月份印在不同設計的卡紙上，意念是一家旅行時，喼內要放的東西，小朋友用的奶樽、女士們的面膜、一家大細都要到的相機等……美觀之餘，亦很實用，非常有心思。
Cathy第二樣拿出來的東西，是她的新卡片，原來她近日升了做「傳媒關係高級經理」，收的兩樣東西我都一樣鍾意，我的新年果真有個好開始，你呢？
林燕玲，人稱「小飛俠」，專欄作家，曾任職銀行董事、電視台新聞主播及記者
都市日報 ｜ 2016年1月7日
http://www.metrohk.com.hk/pda/pda_detail.php?id=299622
林燕玲Facebook: https://www.facebook.com/lamyinling
林燕玲FB: https://www.facebook.com/lamyinling
林燕玲IG: https://www.instagram.com/lamyinlingruby/
林燕玲微博: http://www.weibo.com/
