另有出路 小飛俠加入岳少集團渣打銀行上個月「大瘦身」，衍生工具部關門大吉，連渣打股票衍生及中介銷售部認股證銷售副董事、有「小飛俠」之稱嘅前主播林燕玲，都要告別渣打，不過Kelly聽聞小飛俠搵到好路數，加入咗林建岳（岳少）旗下嘅麗新集團。
岳少雄心壯志，百足咁多爪，身兼旅發局主席、經民聯監事會主席，動作唔少，身邊當然都唔少猛人幫手，當中包括傳媒高層同美女主播，連幫過CY競選嘅前女主播洪綺敏，都曾經係岳少嘅好幫手，而最新加入嘅就係有之稱「小飛俠」嘅林燕玲。
話說林燕玲出身大台新聞部，當年同趙海珠兩個紅極一時，其後佢「轉台」去咗now TV做財經台嘅主播，五年前又被 渣打挖角，遊說佢過檔出任副董事，經常主講窩輪投資嘅講座，至上月尾渣打「大瘦身」，結束成個衍生工具部，林燕玲又回復自由身。
阿童木髮型變「生招牌」
林燕玲嘅花名「小飛俠」，有傳係由同事改嘅，源自佢初做主播時額前有一撮頭髮，十足小飛俠阿童木，點知變咗佢嘅「生招牌」，人氣有加無減。小妹就收到風，呢位口才好兼淡定嘅小飛俠，已經轉投岳少嘅麗新集團，唔知佢係咪做番最拿手嘅金融投資工作呢？
頭條日報 ｜ P26 | 港聞 | EXECUTIVE日記 | By Kelly chu | 2015-12-02
