渣打今年初向企業證券部「開刀」，話唔打擊公司內部士氣就假，幸踏入羊年即有好消息！聽聞渣打銀行（香港）認股證及牛熊證銷售副董事、人稱「小飛俠」嘅渣打輪后Ruby林燕玲升職啦。不過，Ruby升任渣打認股證及牛熊證銷售董事呢個消息，暫時僅限內部公布，四月至生效，所以家陣都仲未印新卡片。
其實，Ruby都算係渣打窩輪業務開國功臣，渣打張輪枱喺二○一○年開，唔夠一年就請到財經台台柱Ruby過檔加盟，出任股票衍生及中介銷售部認股證銷售副董事。加入渣打轉眼四年，Ruby依然周不時落證券行同散戶直接交流，佢講市場動態同分析輪證投資策略，出名淡定兼有口才，又主持窩輪投資講座，不知幾多fans。梗係，佢好勤力，每日刨唔少政治同財經新聞，直頭係渣打窩輪嘅生招牌。
至於佢「小飛俠」個朵，源於當年佢初喺電視做新聞主播時，額前有撮頭髮加埋眼仔碌碌，似足小飛俠阿童木，所以畀同事起咗呢個花名。
林燕玲 facebook: https://www.facebook.com/rubylamxx/
林燕玲IG: https://www.instagram.com/lamyinlingruby/
林燕玲微博: http://www.weibo.com/u/1740435311?is_hot=1
